Kuthe ngeviki eledlule iphalamemnde laKwaZulu Natal laguqa ukuze amalungu alo ahlabe ikhefu. Kulelothuba lokuphumula kulindeleke ukuba kubuyelwe kinina bavoti nethulelwe imibiko futhi niphathise amalungu izindaba okuphuthumayo ukuba kubhekanwe nazo onyakeni omusha. 

Siphawula ukuthi ukuhlala kwephalamende okuphele ngomhlaka 29 November 2007 kukhombise impumelelo engababazekile ekuhlangabezeni izidingo nqangi zomphakathi. Okugqame kakhulu kube yizigigaba ezikhombisa ukuhlehlela emuva kulokho obekulindelwe. 

Ake ngiphawule lokhu okulandelayo: Iphalamende lavota ngobuningi ukweseka umthetho-sivivinywa obizwa ngokuthi 13th Constitutional Amendment Bill. Kwakungeke kwenzeke lokhu ukuba inqubo eyenyanyekayo yokugcogcoma namavoti amanye amaqembu kayinikanga iqembu lika- Khongolose umhlomulo ngalabo abangenawo unembeza. Ngikhuluma lapha ngomthetho ophoqa abaseMatatiele ukuba yingxenye yesifundazwe saseKoloni eseMpumalanga esikhungethwe ububha nenkohlakalo engakaze ibonwe emlandweni wezwe lakithi.  

Angikaze ngiyibone impicabadala yokukhohlisa abantu kuthiwa kulalelwa uvo lwabo. Konke okwashiwo abantu baseMatatiele/Maluti akuzange kwenze umehluko kunkulumo-mpikiswano ephalamende laKwaZulu Natal. Isinqumo kwaba yileso esasivuma ikomkhulu leqembu elibusayo. 

Ngokunjalo abantu baKwaZulu Natal baphoqeke ukubekezelela insakavukela yomantunta-nendishi bamajadu okugcaluzisa iphalamende kanye nalokho okubizwa ngokuthi yizimbizo. Iqiniso elisobala ngisho enganeni ekhasela eziko ukuthi lemikhankaso kuqondwe ngayo ukuzuzela iqembu elibusayo ukwesekwa ezinkethweni. Kungamanga aluhlaza cwe ukuthi lamajadu anenhloso yokuhlangabeza izidingo zabantu nokuletha intuthuko abayidinga kakhulu. 

Kuyethusa ukuthi iphalamende lehlulekile ukusebenzisa onke amathuba ebelinawo ukwenza umsebenzi wokuqapha ngeso lokhozi ukusebenza kweqembu elibusayo. Ukwehluleka ukwenza umsebenzi kwadalwa ngamathuba amaningi okucasha ngomkhwani. Lezizenzo zikhonjwa esigungwini sikahulumeni wesifundazwe kanye nakubaphathi nabalawuli bephalamende. Ngethula esidlangaleni somphakathi imisebenzi ebalulekile esizweni engazange ibekwe ezithebeni zephalamende: umbiko wophenyo olwenziwa ngabakwa Ernst and Young, bephanda bembulula ngokuhluleka kwenhloko eyayikhona ukuphatha umnyango kanye nenkohlakalo, umphumela wophenyo olwenziwa ngenhloko yoMnyango weZempilo uDokotela Busi Nyembezi, umphumela wophenyo ngalokho okuthiwa kwenzeka ebhodini yokongiwa kweMvelo. 

Kunemibiko yophenyo eyenziwa ngesikhathi nginguNdunankulu engazange yethulwe ezithebeni zephalamende. Ngibala lapho lemibiko elandelayo:

owenziwa yijaji u- Alexander ngezinkinga ezadala udlame nokuchitheka kwegazi embonini yezokuthutha, owenziwa yijaji uBooysen ngodaba lokuthengwa kwezindlu, izibhucu zamahhotela, namapulazi. Kuyethusa ukuthi lohulumeni kaKhongolose usephathe izintambo zombuso iminyaka emithathu nezinyanga eziyisithupha kodwa wehluleka ukwethula lemibiko ephalamende lesifundazwe. Uyifunda ivaliwe ukuthi lohulumeni wehluleka kangakanani emgomeni wokubusa ngendlela ephumele eshashalazini. Lapho kungekho lutho olufihlwayo. 

Njengomholi weqembu eliphikisayo ngizibophezela emgomeni wokuqinisa umsebenzi omqoka wephalamende wokuqapha ngeso lokhozi uNdunankulu nesigungu sakhe. Lesisibophezelo sami ngiqonde ngaso ukwenelisa izidingo zezakhamizi kanye nabakhokhi bentela. Ngiyowufeza lomgomo enyakeni ozayo ka-2008      

nguDokotela Lionel Mtshali
UMholi weQembu Eliphikisayo



Contact: Dr Lionel Mtshali, 083 256 4902