Unyaka omusha ka-2008 ucebe kakhulu ngesinselele kanye namathuba amangalisayo. 

Umlayezo wengquthela yonyaka ye–ANC eyayibanjelwe ePolokwane ngasekupheleni kwenyanga ka-December 2007 wawusobla futhi ungadingi ukuhumushwa. Izakhamizi zaseNingizimu Afika ezisezingeni eliphansi zalibeka lema ngesihloko elithi kazenelisiwe yisivinini nomthamo wokwethulwa kwezinsiza zentuthuko. Lesisimo sifakazelwa ngokwenzekile kusukela ngo-1994 lapho uhulumeni we-ANC aqhoqhobala uhulumeni wezwe lakithi. 

Ngikholwa ukuthi abantu bakhathele ukubona abaholi bombusazwe kanye nezinhloko zeminyango kahulumeni zitetemuka phansi phezulu ngezimoto zakwanokusho kuhlolwa izinto okudingeka ukuba zenziwe kodwa kube kungekho nhloso yokwenza utho. 

Phezu kwezinselele zeminyaka zobuphofu, izifo nobugebengu, ukuhola izinyawo okwenziwa ngabasebenzi eminyangweni kahulumeni eminyakeni eyi-13 sekudale ezinye izinkinga. Ukwehluleka nokusilela emuva ukuhlinzeka umphakathi ngezindlu, ezempilo kanye nemfundo sekudale okukhulu ukungabaza ngezisekelo zemigomo kahulumeni okwakhelwe kuyo lezizinhlelo. 

Iqembu leNkatha yeNkululeko njengeqembu eliphikisayo seligqolozele ukhetho oluzayo oluyoba yinkundla yokwenekela izwe ukwehluleka kukahulumeni oqhoqhobele amandla ezweni. Silangazelela ithuba lokuphosela uhulumeni inselele. Sizimisele ukwenza umnikelo njengohulumeni wethuba elizayo okholelwa emisebenzini ebonakalayo kunokuchitha imali nesikhathi kucikozwa ngezinhlelo ezingasukumi phansi. Lesisihlekehleke sikahulumeni ozinze ePitoli sehlulekile ukufeza izidingo zomphakathi ezikoleni, ezibhedlela, eziteshini zamaphoyisa kanye nasezinhlelweni zokwakhiwa kwezindlu. Siphawula ukuthi lokhu kwehluleka kukahulumeni kakudalwa ngukungeneli kwezimali kodwa ukungakwazi ukuphuthuma izidingo ngendlela ekhombisa ukushiyana kwazo. Ngokunjalo kunokwehluleka ngenxa yokuntuleka kwamakhono abasebenzi kanye nokuzimisela. 

Akungatshazwa ukuthi umphumela wokhetho luka-2009 uyobuyisa KwaZulu Natal uhulumeni onomlando wokwenza kunokucikoza. Silibeka ngembaba elithi loluguquko luyodalwa yivoti labavoti besifundazwe nalabo bezwe lakithi. Asikho isidingo sokwesekela iqembu elizibambezele ngemigomo engabenzelanga lutho abantu.

Sekungangakho ukuba amandla ombuso abuyele kulabo abayokwenza umehluko. 

Iqembu leNkatha yeNkululeko libuka phambili kunohulumeni owehlukile futhi okhetha iphela emasini nosebenza ngendlela engenasizotha. I-IFP iphokephele ukuba nguhulumeni ongasebenzisi izintela zabakhoklintela ngendlela yokuba babaphathe futhi babalawule nokuba zigqila zeqembu elinguhulumeni wesifundazwe. I-IFP ilangazela ukuba nguhulumeni wesifundazwe saKwaZulu Natal ngo-2009 oyophatha ngendlela engcono kakhulu kunalokhu okwenziwa yi-ANC.

 nguDokotela Lionel Mtshali
UMholi weQembu Eliphikisayo



Contact: Dr Lionel Mtshali, 083 256 4902