Ngike ngabamba iqhaza njengosihlalo weKomidi lezokuPhepha nokuVikela umphakathi. Ukuqhuba kwami lomsebenzi kunginike ithuba lokusondelela eduze ezokuphepha nezokuvikeleka komphakathi. Yingakho nje imiphumela yocwaningo eyenziwe yisigungu esibizwa ngokuthi "Institute for Security Studies"

ingasethusanga. Sisho phela labo abacwaninga ngezindaba zokuvikelwa komphakathi abadalule isimo esethusayo esilandela ukuhlukumezeka kwamaphoyisa. Futhi bembulele izwe ukwehluleka kombutho wamaphoyisa ukwehlisa umthwalo osemahlombe alabo abedlula ezimeni ezishaqisayo.

Izimo ezihlasimulisa umzimba ezidalwa ngukugqolozela ukuchitheka kwegazi nokubulawa kwabantu kwemukelwa njengalokho okuyingxenye yempilo yamaphoyisa. Futhi kuvamile ukuba umbutho wamaphoyisa ubonakale ungakuhlomele ngokuzimisela nangezinsiza ukweseka lawo malungu asuke ehlukumezekile edinga nezeluleko ezifanele.

Kukhona phela nokwesaba ukukhombisa isimo esigqamisa imizwa kwamanye amaphoyisa. Lokhu kuphambene nezinselele nobunzima bokulwa nobugebengu.

Okwethusa kakhulu yisimo sokuntuleka kobuholi embuthweni wamaphoyisa kanye nokuvivela ukugqolozela ubugebengu. Lokhu okuphawulwayo kubonakala kuhulumeni kazwelonke kanye nakhona ezifundazweni. Izimo ezinjenga lezi zifaka amaphoyisa uvalo nokuhlukumezeka kwemizwa. Sikhuluma lapha ngalawo maphoyisa abhekana nubugebengu usuku nosuku.

Ngiphosa inselele yobuqotho uma sikhuluma ngobugebengu obudlondlobele ngendlela eyesabisayo futhi obubonakala bunganakiwe noma kungathi buyemukeleka. Awekho amaqhinga amasha nemikhankaso ehleliwe yokulwa nesimo sobugebengu. Kubonakala songathi akukho ukuphuthuma ukulwa nobugebengu nokunqoba izigebengu. Uma sibuka uhulumeni wezwe lakithi ozinikele ekungeneleleni ezindabeni kanye nasekubekeni imigomo enqunyelwe isikhathi, sibona uhulumeni kaKhongolose ekude kakhulu nokunquma lokho okungathenjelwa kukho ekulweni nobugebengu. 

Iqembu leNkatha yeNkululeko likhuthaza umbutho wamaphoyisa kuzwelonke nasezifundazweni ukuba ukhuphule izinga lezinhlelo nezikhungo zokweseka amaphoyisa ahlukumezekile ezingqondweni kanye nasemizimbeni. Sikhuthaza uhulumeni ukuba acele usizo kosonhlalakahle, abaholi bezenkolo kanye nochwepheshe kwezengqondo. Okwedlula konke iqembu leNkatha yeNkululeko likhuthaza uhulumeni ukuba akhombise ukuzimisela ukulwa nobugebengu.

 nguDokotela Lionel Mtshali
UMholi weQembu Eliphikisayo



Contact: Dr Lionel Mtshali, 083 256 4902