UMLAYEZO WEVIKI OVELA KUMHOLI WEQEMBU ELIPHIKISAYO OBHEKISWE KUBANTU BAKWAZULU NATALI
 

April 10, 2007

Zakhamizi zesifundazwe saKwaZulu Natal

Njengomuntu onikele yonke impilo yakhe emzabalazweni wokuzilawula kwabantu esifundazweni sakithi, ngikuqonda kahle kakhulu ukuthi kusho ukuthini ezinkulungwane ezilikhulu zalabo baseMatatiele nezindawo ezakhelene nabo ukuphoqelelwa endaweni esilele emuva.

Kungumlando ukuthi indawo yase East Griqualand ehlanganisa oMaluti, Matatiele ne- Cedarville ineminyaka iyingxenye yesifundazwe saKwaZulu Natal.
Ukuphoqelelwa ukuba yingxenye yaseKoloni eseMpumalanga kuyohlukumeza lemiphakathi ngokufakwa kumasipala wesifunda – Alfred Nzo odume ngokusilela emuva entuthukweni nasekuhlangabezweni kwezidingo nqangi. Lolufuduko oluphoqelelwa kubantu luyoba nomphumela wokunqanda izinhlelo zentuthuko ezihlelwe KwaZulu Natal.

Kunezizathu okufanele ukuba zicatshangisiswe futhi zihlonishwe ezenza lemiphakathi iqhubeke nokubayizakhamizi zaKwaZulu Natal. Bakhe ezweni lemfuyo nokulima ukudla. Uma siqhathanisa nelaseKoloni eseMpumalanga baya ekuhluphekeni lapho uhulumeni wakhona ehluleka ukuphatha nokusebenzisa izintela zabantu azabelwa nguhulumeni kazwelonke ePitoli. Siyakuqaphela ukuthi baseduze nohulumeni wesifundazwe eMgungundlovu kunase Bisho. Ibanga phakathi kwaseMatatiele naseMgungundlovu lingamahora amabili kunaseBisho okungamahora ayisikhombisa.

Siyawuhlonipha umzabalazo wabantu baseMatatiele wokulumela ngezinyawo loludaba beya emgwaqeni ngobuningi babo bephethe izingqwembe futhi benza isethulo sabo kuhulumeni. Lokhu kwenza kwabo kuyimpumelelo yemiphakathi egqilazwayo. Iqembu le-Nkatha lizwelana nabo futhi liyawusekela umkhankaso wabo. Inkatha ithi isenzo sokuphoqa abantu kasehlukene nalokho okwakwenziwa nguhukumeni wobandlululo ethuthela abantu ezindaweni abangazazi futhi behlukaniswa namagugu omlando wabo.

Phezu kokuziqhayisa ngesenzo sokuxoxisana nabantu abathintekayo, uhulumeni waKwaZulu Natal oholwa yi- ANC wehlulekile ukuyozwa uvo lwabantu ngendlela eyenelisayo njengokulawula komthetho sisekelo wezwe. Inkantolo yomthetho sisekelo ikhiphe isinqumo esivimba ukusebenza komthetho olawula imingcele phakathi kwezifundazwe ezimbili ezakhelene- KwaZulu Natal naseKoloni eseMpumalanga.

Ukuzinikela kweqembu le-IFP ekuhlonipheni ilungelo labantu lokuzilawula kuyaliphoqa ukuba lizihlanganise nomzabalazo wokubhekana ezinhlamvini zamehlo nesenzo esikhombisa ukuntula ukulungisa. Sizinikele ukusekela ilungelo labantu baseMatatiele ukuzikhethela lapho beyizakhamizi zakhona. Umlayezo wami namuhla usobala futhi awungatshazwa. I-IFP ibambisene nani bafowethu nodadewethu baseMatatiele kuze kuxazululwe udaba lwemingcele.

nguDokotela Lionel Mtshali ilungu lePhalamende leSifundazwe UMholi weQembu Eliphikisayo

Contact: Dr Lionel Mtshali, 083 256 4902