Leminyaka emithathu leliphalamende likhona igqamise izindlela ezihlelwe ngokukhulu ukucophelela kanye nobuqili. Kunamaqhinga okuhlukumeza nokubamba amaqembu aphikisayo isamuku. Kunezinqumo zikaSomlomo ezinenhloso yokwenzelela kanye nokuthuntubeza amagalelo amaqembu amelene nohulumeni. Singofakazi bamaqhinga okuguqulwa kwemithetho yeNdlu ukuze kufezwe izinhloso zeqembu elibusayo. Iqembu leNkatha lithi sekwenele.
Ngeke sibekezelele ukuqhoqhobalwa nguSomlomo ngalendlela.

Iqembu leNkatha alikholwa ukuthi uSomlomo uMnumzane Willes Mchunu, futhi ongusihlalo wenhlangano yamaKhomanisi kulesisifundazwe, ukufanele ukuhola leliphalamende phezu kwemigomo yokuhloniphana kwamaqembu ehlukene, ukubekezelelana kanye nokungachemi.

Sithi labo asebebenethuba lokwethamela izinkulumo- mpikiswano zaleNdlu ehloniphekile bangofakazi bokuthi uSomlomo akalishayi mkhuba iqembu eliphikisayo. Sekucace kwathi bha ukuthi uSomlomo akakuthakaseli ukuphikiswa enkundleni yombusazwe.

Noma yikuphi ukuhlaba izenzo nezinqumo zongqongqoshe noNdunankulu kubukwa ngeso lokuvukela umbuso. Kuyishwa ukuthi ukuphikisa uhulumeni ngokulawula kwentando yeningi kwenza abanzenjalo kuthiwe bayizitha zikahulumeni. Thina beqembu leNkatha sithi umshikashika wokuphikisa uhulumeni ngobuqotho uzoqhubeka kuleliphalamende ngisho angathini uSomlomo.

Akukho ukukhululeka kuleliphalamende. Akukho ukuthokoza kuleliphalamende. Ithuba likaSomlomo lokuhola leliphalamende lichumise ukuzizuzela amandla kanye nokubeka engcupheni intando yeningi.

Isimo senqubo yaleliphalamende sehluke kakhulu kuleso sika 1994-2004.
Ngaleyominyaka iphalamende laliholwa nguSomlomo owayengeyona indlovu kayiphendulwa. Kodwa wayebambisene nozakwabo abamele amaqembu ehlukene ngaphansi kwesakhiwo esabizwa ngokuthi yi Executive Board. USomlomo wangalesosikhathi nozakwabo benza iphalamende lahlonipheka. Futhi babezinikele emigomeni elandelayo: ukungachemi naluhlangothi, ukubekezelelana kanye nokuvuleleka emaqenjini ombusazwe ehlukene.

Sekunesimo sokungeneliswa yindlela aziphethe ngayo uSomlomo njengoba sekuvele naseqenjini likaKhongolose. I- IFP ithuma. I-ANC ukuba icabangisise ngezimfuno zamaqembu aphikisayo njengoba zilotshwe encwadini evulekile eqondiswe kuSomlomo. Sithuma i-ANC ukuba ibonisane nozakwabo uSomlomo ukuba ehlise isimo sokuphakama kwemimoya ephalamende ukuze kuqhubeke intando yeningi ephalamende laKwaZulu Natal kanye nangaphandle.

nguDokotela Lionel Mtshali ilungu lePhalamende leSifundazwe UMholi weQembu Eliphikisayo

Contact: Dr Lionel Mtshali, 083 256 4902