UMLAYEZO WEVIKI OVELA KUMHOLI WEQEMBU ELIPHIKISAYO OBHEKISWE KUBANTU BAKWAZULU NATALI
 

April 16, 2007

Zakhamizi zesifundazwe saKwaZulu Natal

Selokhu lathatha izintambo zombuso kulesisifundazwe iqembu le-ANC alisishayimkhuba isimo senkohlakalo ezinhleni zalo. Uma kwenzekile ukuba iqembu elibusayo likhulume ngenkohlakalo, likwenza ngobukhulu ubuciko ukukhipha inyumbazana lezozikhulu zikaHulumeni eziqashelwe ukuphatha izimali zikahulumeni. Kunokwenzeka ukuthi lezizikhulu aziqondisisi noma azikwenze kubaluleke ukuzinikela kukahulumeni ukuhlangabeza izidingo zabantu. Yingakho nje lezizikhulu ziqhuba ngendlela ephambene futhi engahambisani nezinhloso ezinhle zikahulumeni.

Kuyadabukisa ukuthi isimo sezinto sikhombisa umfanekiso owehlukile.
Inkohlakalo nokuhambisana kwayo nobudlabha kwedlulele kunalokho uhulumeni angafisa ukuba sikukholwe. Singalinganisa ngalokho okusematheni ngendlela yokusehluleka kwezikhulu eziphezulu zoMnyango weZolimo. Lezozikhulu ezimbili kulomnyango ezithintekayo ezenzweni zenkohlakalo nobudlabha ekuphatheni futhi eziphenywayo kubeka ebucayini izinhlelo zentuthuko zomnyango. Izenzo ezingemukeleki zalezizikhulu zifana nesihlava esiwudle sawuqeda umnyango kusuka phezulu kuya phansi esiqwini. Lomonakalo ongaka wabhebhethekisa okomlilo wequbula ngenxa yokukhuselwa kwalelzizikhulu ezindaweni eziphezulu embusweni wesifundazwe.

Kunobufakazi obuqanda ikhanda obugcizelela izinkomba zokuthi phezu kwabakhethwa bezombusazwe nezikhulu eziqhashwe kuhulumeni zithinteka ngazinye ezenzweni zenkohlakalo, kuya ngokuqina ukungena umkhono nesiphanga kwabathile emkhakheni wezimboni nohwebo. Ucwaningo ngenkohlakalo olwenziwe ngabakwa “Business Against Crime and Corruption” belugxile esimeni senkohlakalo esigabeni sosozimboni nabahwebi. Lolucwaningo luveza izinkomba ezethusayo zokuphatheka kwalomkhakha nabathile kuhulumeni.

Iqembu leNkatha lenza lomnikelo olandelayo ukubhekana nalolukhondolo.
Ukuvuselela isiko lokuphatha uhulumeni ngendlela ehlanzekile. Sidinga imigomo nezinhlelo zokwesekela iminyango kahulumeni ekwenzeni leyomisebenzi eziyabelwe kanye nokuqinisa ukusebenza kulabo abasikhethayo nalabo abangabaqashi bethu.
Lemigomo nezinhlelo eziqotho kudingeka ukuba zingagcini zingamaphupho nje.
Iqembu leNkatha limele imigomo yokuzibophezela komuntu ngamunye endleleni yokuziphatha. Iqembu leNkatha likhuthaza isiko lokulandelwa eduze nokubekwa esikalini kwabasebenzi bakahulumeni. Iqembu leNkatha likhuthaza ukudalulwa kwenkohlakalo eminyangweni kahulumeni nasemikhakheni ezimele ngaphandle kwezakhiwo zikahulumeni. Thina beNkatha sikholwa ukuthi lomnikelo esiwethula ebandla uyizikhali esinazo ukulwa nenkohlakalo.

nguDokotela Lionel Mtshali ilungu lePhalamende leSifundazwe UMholi weQembu Eliphikisayo

Contact: Dr Lionel Mtshali, 083 256 4902