UMLAYEZO WEVIKI OVELA KUMHOLI WEQEMBU ELIPHIKISAYO OBHEKISWE KUBANTU BAKWAZULU NATALI
 

March 19, 2007

Bangani nabantu bakithi abathandekayo baseNingizimu ne-Afrika

Sekungumlando oqoshwe phansi nasemiqondweni yabantu ukuthi: i-IFP iyakuphikisa ukwakhiwa kwezindlu zephalamende lapha eMgungundlovu.
Asikho isizathu esingenza ukuba i-IFP izihlanganise nalesisenzo sokusaphaza izimali ezingekho phezu kwezidingo ezingaka ku lesisifundazwe. Namanje thina be-IFP siyakuphikisa ukuthi i-ANC ingaqhubeka nokwakha elinye iphalamende emuva kweminyaka emithathu kwafudukwa Ondini. Kusobala ukuthi iqembu elibusayo liphoqa isimo ngokwezimfuno zalo ngephalamende lesithathu. Sithi zikhona izakhiwo zephalamende Ondini naseMgungundlovu.

Siyababaza ukusangana ngamaphalamende. Kumanje izwe lakithi linamaphalamende alishumi uma sihlanganisa lawo ezifundazwe nalelo likazwelonke eKapa. Ukuzicabangela kwe-ANC kuzoba nomphumela wamaphalamende amathathu KwaZulu Natali. Azokwenzani lamaphalamende njengoba emancane kangaka amandla okuzilawula anikwe izifundazwe?
Mingaki imithetho eshaywa yileliphalamende ngonyaka?

Ungeke ulethembe iqembu le-ANC. Izinkolelo zalo ziguquguquka kuhle konwabu. Kusobala ukuthi i-ANC ayizihluphi ngezidingo zabantu kanye nezifiso zabo. Okuphambili ku- ANC ukuzizwa amandla okuqhoqhobala uhulumeni. Kunokwehlukana kwemibono phakathi kwe-IFP ne- ANC ngalokho okumgumsebenzi wephalamende. Amalungu e-IFP athi iphalamende linomthwalo wokwenza kubelula ukuba kuhlangatshezwe izidingo nqangi zabantu: ukudla, izindlu, amanzi nokuthuthwa kwendle nemfucumfucu, ukulwa nezifo, ubuphofu nokuntuleka kwamathuba omsebenzi. Sithi izidingo zabantu zihamba phambili kwak ho konke okunye kokuzenzela udumo oluyize.

Lezizakhiwo sizilinganisela kulesisizumbulu semali- R600million. Phela yimali eyasetshenziswa ngesakhiwo sephalamende lesifundazwe saseMpumalanga. Imali engaka ingenza lemisebenzi elandelayo lapha KwaZulu Natal:

Ukwakha izikolo ezingu-12
Ukwakha imitholampilo engu-12
Ukuhlangabeza izidingo zemiphakathi engu- 48 000

Imali engaka ingakhokhela ngisho amanzi nogesi kulemiphakathi esikhuluma ngayo. Uma kungathiwa akukhethwe phakathi kwezidingo zabantu nephalamende lesithathu, i-IFP ingakhetha ukutakula abantu osizini.
nguDokotela Lionel Mtshali ilungu lePhalamende leSifundazwe UMholi weQembu Eliphikisayo

Contact: Dr Lionel Mtshali, 083 256 4902