Imikhuba ye-ANC yokuqhubeka nezindlela zokuhlala phezu kwamaqiniso ngendlela yokubuswa kwesifundazwe saKwaZulu Natal isikhinyabeze umsebenzi wephalamende wokwalusa amalugu esigungu sikahulumeni. Iqembu leNkatha yeNkululeko likhathazekile ngokungaphendulwa kwemibuzo eshaya emhloleni ephalamende. Lokhu kwenziwa nguNdunankulu namalugu esigungu sikahulumeni. Iqembu le-IFP lethula lesisimo sakwangqingetshe bukhoma kubantu baKwaZulu Natal ukuze bazihlaziyele futhi bafike ekwenzeni izinqumo ezifanele. 

Udaba olusematheni yilolo lokungethulwa kombiko wabaphenyi bakwa- Ernst and Young ngokusaphazwa kwezimali nokwehluleka ukuphatha umsebenzi eMnyangweni wezoLimo ngenkathi iNhloko yomnyango kungu- Dokotela Jabulani Mjwara. 

Thina beqembu eliphikisayo siphonsela inselele iqembu elibusayo ukuba liphumele eshashalazini lichaze ukuthi lombiko obhekwe ngamehlo amnyama uyokwethulwa nini ezithebeni zephalamende. Iqembu elibusayo silethwesa umthwalo wokuba ligeqe amagula ngezizathu ezibambezele ukwenekwa kwalombiko wophenyo phambi kwezihlwele zofakazi. Siqhubeka futhi sinxusa uNdunankulu ngokwesikhundla sakhe sokuba yinhloko yesigungu sikahulumeni ukuba akwemukele ukuthi amabhizela ayolandela lokho okuqukethwe yilowombiko afanele ukuba wutwayi lwakhe. 

Ngokunjalo siphawula ukuthi uhlelo olusungulwe yi-ANC lokusa iphalamende kubantu seliphenduke ihlathi lokusaphazwa kwezintela zabantu. Sikusho lokhu ngokomgomo kanye nangezenzo ezisifakazelayo. Umholi wephalamende, phecelezi unobhala walo, wehlulekile ukuchaza ngokugcwele futhi nokwenelisa ihhovisi

lomhloli- mabhuku kahulumeni (Auditor- General) ngemibuzo eqondene nokuphathwa nokusetshenziswa kwezimali okuqondene ngqo nalomkhankaso. Kubelukhuni satshe ukwenelisa iKomidi Elicwaninga imibiko yoMhloli mabhuku kahulumeni. Futhi ziyime emthumeni ngemibuzo ebhalwe phansi yiqembu elibusayo. 

Ngakho- ke i-IFP ikhuthaza iqembu eliqhoqhobele izintambo zombuso ukuba limise lomkhankaso ukunikeza iphalamende ithuba lokuchaza ngendlela eyemukelekayo ngezindlela zokuphathwa nokusetshenziswa kwezimali ezihlelelwe lomsebenzi.

Sithi akekumiwe kuze kuchazwe futhi kube nokwenaba ngalokho okuzuzwa yizakhamizi zalesisifundazwe. 

Iqembu eliphikisayo likhathazekile ngesimo sokubukana ngeziqu zamehlo phakathi kukaNgqonngqoshe Peggy Nkonyeni kanye nalowo owayeyinhloko yomnyango weZempilo uDokotela Busi Nyembezi. Sithi akwemukelekile ukuthi umdonsiswano phakathi kwenhloko nobuholi bomnyango busukunyelwe yisigungu sikahlulumeni ngendlela eyedlula ukulethwa kwezinsiza zempilo kubantu. Siphawula isifo sengculaza nezinye izifo eziyimixhantela yaso esezibhubhisile kulesisifundazwe. Sithi akubhekwane nesimo esiphuthumayo sokuhlenga imiphefumulo yabantu. 

nguDokotela Lionel Mtshali
UMholi weQembu Eliphikisayo



Contact: Dr Lionel Mtshali, 083 256 4902