Zakhamizi zesifundazwe saKwaZulu Natal

Loludungunyane olungenele iqembu elibusayo kulandela ukwehliswa isithunzi kukaMhlonishwa TM Mbeki obenguMengameli wezwe, luhlangene nesilonda esibhibhayo sobugebengu ezweni laseNingizimu Afrika, selwenze kwanzima ukunxenxa abafunde bagogoda emikhakheni eyehlukene ukuzofukula imisebenzi yokuphatha, nokuthuthukisa izwe. Labo abahlome ngemfundo, ubuchwepheshe namakhono sekulukhuni ukubadoba emazweni angaphandle.

Ongqeqe abahlaziya lesisimo balimisa ngesihloko elithi kusekude phambili. Ukugqolozelana nalobubunzima kuzoqhubeka eminyakeni elishumi nanhlanu kuya kwengama- 25. Kuleminyaka ebalwayo uhlelo lwemfundo yezwe lethu luzobe luguquka ngendlela eyokwenza ukuba kuqeqeshwe abahlome ngokuphelele.  

Inkinga ekhungethe uhlelo lwemfundo yethu idalwa ukuthi izinguquko ezisungulwa nguhulumeni ngenhloso yokwenza isimo sibengcono zibonakala zibuyisela emuva okuhloswe ngakho ukukhuphula izinga lemfundo. Kunjalo nje kushayeka bonke abathintekayo emfundweni. Ngiphawula lapha ngokuqhubeka kokushona phansi kwezinga lemiphumela kumatikuletsheni kanye nokungazihloniphi okwenzeka ezikoleni zaKwaZulu Natal.  

Uhulumeni ugqolozelwe yingqinamba yesimo semfundo eyifa lobandlululo.

Lokho kwenza kube lukhuni ukufaka imfundo yokulungisela abafundi izinselele zezindawo zomsebenzi. Sisho phela ukuhlangabeza izidingo zabaqhashi. Esinye sezizathu ezidala lokhu yikuthi izwe laseNingizimu Afrika liswele abafundisi abaseqophelweni eliphezulu futhi abanomdlandla ngobizo lwabo. Lenselele iqhutshelwa phambili yisinyathelo nesinqumo sikahulumeni sokuvala zonke izikhungo zokuqeqesha othisha. Okunye okuqhubela phambili isimo esibi kungumphumela wezinguquko zikahulumeni ezehluleka ukuhlangabeza ukwandiswa kothisha kulezizifundo: Mathematics, izifundo zamakhono nobuchwepheshe kuhlangene nezidingo zolwazi lwemfundo oludingwa yizwe lakithi.  

Njengomunye walabo abaqeqeshwa kwezemfundo nokufundisa ngikumele ngazo zombili ukuqhuba umkhankaso okhuthaza uhlobo lwemfundo olunemikhakha eyehlukene ukuze luhlangabeze izidingo zesizwe kwezamakhono, ubuchwepheshe kanye nezinye izidingo zolwazi lwemfundo. Ukuze kufezwe lomgomo kuyasiphoqa ukuqeqesha nokukhulisa ithimba lothisha abanolwazi olunzulu futhi abanogqozi emsebenzini wabo. Kuyaphuthuma futhi ukubaholela amaholo ahambelana nezinselele zempilo esimeni somnotho esiguquguqukayo.  

Izwe libhekene nenselele yokuqeqesha othisha abaningi ezikhungweni eziningi kanye nokuhlangabeza isidingo semifundaze ezifundweni

ezilandelayo: Mathematics, kanye nobuchwepheshe. Kuyaphuthuma ukuba sikucabange futhi sikwenze ukubuyisa othisha abagogodile futhi benethuba elide ekufundiseni. Ngikhuluma lapha ngalolohlobo lothisha olwaphoqeka ukuyeka umsebenzi kungakafiki isikhathi sokuyodla impesheni.

Siyophumelela ukudoba lengcwenga yothisha ngokubahhehha ngokubahlinzekela ngalokho okuyobakhuthaza njengemihlulo eyengeziwe.

nguDokotela Lionel Mtshali                       
UMholi weQembu Eliphikisayo        

Contact: Dr Lionel Mtshali, 083 256 4902