Kuyo yonke iminyaka engiyichithe emzabalazweni wokubhidliza ubandlululo, ekubambeni iqhaza kuhulumeni wesifundazwe saKwaZulu Natal namanje njengomholi weqembu eliphikisayo, ngikitazwe yindlela i-ANC edlala ngayo umdlalo wamagende ngokudida abantu ngamazwi.

Kulezinsuku sesibeleselwe ngesisho esibeka phambili uhulumeni wasekhaya oqinile. Kuyindida ukwemukela ubuqotho balesisisho njengoba kwaziwa yizwe lonke ukuthi uhulumeni kaKhongolose ukholelwa kakhulu kuhulumeni omkhulu ogweve nawo wonke amandla okulawula nokubusa. Yingane ekhasela eziko engemukela ukuthi kuyoke kwenzeke ukuba kube nohulumeni abaqinile ezingeni lasekhaya.

Lomsindo obangwa ngohulumeni wasekhaya oqinile kwagwenywa ngawo iqiniso kunkulumo-mpikiswano ngomthetho-sivivinywa obizwa ngokuthi phecelezi “13th Constitutional Amendment Bill”. Ngikhuluma lapha ngesichibiyelo somthetho-sisekelo wezwe onhloso yawo kwakungukudweba kabusha imingcele nokuphoqa izakhamizi zaseMatatiele/Maluti ukuba yingxenye yesifundazwe aseKoloni eseMpamalanga.

Akenginichazele ukuthi uKhongolose uqonde ukuhlukumeza nokuphonsa abase Matatiele/Maluti emphandwini wezingonyama esifundazweni saseKoloni eseMpumalanga. Kusobala ukuthi ukwehluleka ukuphatha ohulumeni basekhaya kwakungeke kuqiniswe ngokuphoqelelwa kokufakwa kukamasipala waseMatatile/Maluti esifundazweni esinomlando wokwehluleka ukulandela imithetho yenqubo yokubusa nokuphatha nokusebenzisa izintela zabantu.

Akungatshazwa ukuthi ufuduko lwempoqo lwabantu baseMatatiele/Maluti lubenza babe yingxenye yesifundazwe esehlulekile ukuletha izinsiza kubantu.

Isifundazwe esingenayo intuthuko. Isifundazwe esikhungethwe yindlala nobubha.

Thina njengeqembu eliphikisayo kusima ematheni ukuthi kwenziwa yini ukuba amashoshozela ohulumeni basekhaya abaqavile angalushayi mkhuba uvo lwabantu baseMatatiele/Maluti. Impela ungeke ulethembe iqembu le-ANC. Akusho lutho kuKhongolose ukulala uphenduka.

Nakho okukhulu osekwenzeke kumasipala omkhulu weTheku ophethwe yi-ANC.

Isifunda seTheku seqembu elibusayo siphumele eshashalazini sathatha isinqumo esingu juqu ngendlela ihhovisi likaNdunankulu elenza ngayo izinto lingakhombisi ukuhxumana nokuhlonipha umasipala nezakhiwo. Unobhala wesifunda seTheku ukubeke kanje lokhu, ”Ihhovisi likaNdunankulu liyazingenela nje ezindaweni ngaphandle kokubonisana nomasipala kanye nezakhiwo ezingeni lasekhaya”.

Sekungumlando ukuthi iqembu leNkatha yeNkululeko selikhale lazithulisa kuhulumeni wesifundazwe oholwa yi-ANC likhuza umhlolo wokufohla. Likhuza ukungabonisani nomasipala abaphethwe yi-IFP lapho kunemicimbi yentuthuko kulezo zigaba okubanjiswana kuzo ngokulawula kwesakhiwo sezwe. Sekucace kwathi bha ukuthi uhulumeni wesifundazwe oholwa nguNdunankulu ka- ANC ubabukela phansi omasipala ngisho ezindaweni lapho kubusa khona uKhongolose.

Iqembu leNkatha yeNkululeko aligudluki enkolelweni yalo ethi akusizi lutho ukuqonela omasipala. Isenzo esinjalo siphikisa leli hhohhomezi lomsindo elenziwayo kuthiwa kukholelwa kohulumeni basekhaya abaqinile. Inqubo ye-ANC iphambene naleyo ye-IFP ebudlelwaneni bayo nomasipala ngenkathi i-IFP inguhulumeni wesifundazwe phakathi kuka 1994 no 2004.

nguDokotela Lionel Mtshali
UMholi weQembu Eliphikisayo



Contact: Dr Lionel Mtshali, 083 256 4902