Kuleliviki iphalamende laKwaZulu Natal liyothatha isinqumo esimqoka empilweni yenu. Leliphalamende okulindeleke ukuba libengumlamuli ekuhlukumezekeni kwamalungelo empilo yenu, akungatshazwa ukuthi ngezwi leningi lamaulungu ka-ANC azuzwe ngohlelo lokugcogcoma nezihlalo liyothatha isinqumo esingujuqu sokunenza izakhamizi zaseKoloni eseMpumalanga. 

Umthetho owashaywa yiphalamende likazwelonke eminyakeni emibili eyedlule wanquma ukuthi indawo yaseMatatiele, phakathi kwezinye, ingene ngaphansi kwesifundazwe saseKoloni eseMpumalanga ngokuklanywa kabusha kwemingcele.Lesisenzo sempoqo senziwa phezu komkhankaso ongasuki phansi wokusiphikisa owawuholwa yikomiti elalizibiza ngokuthi elizabalazele umphakathi waseMatatiele/Maluti elalibambisene neNkatha Yenkululeko.

Sathatha ngokuthi abantu abaningi babengafuni ukwehlukana nesifudazwe sabo senkaba saKwaZulu Natal.

Sekungumlando ukuthi leyomithetho okwaxetshulwa ngayo indawo yaseMatatiele KwaZulu Natal yachithwa yinkantolo yezwe yesakhiwo(Constitutional Court). Isizathu salesisinqumo senkantolo kwaba ngukuthi ukubonisana nabantu abathintekayo kwakungenziwanga ngendlela evulekele bonke abantu. Lokhu ukungezwa uvo lweningi elithintekayo kwenzeka esifundazweni saKwaZulu Natal. Yingakho nje i-ANC enguhulumeni KwaZulu Natal naseKoloni eseMpumalanga isungule icebo elithathelwe phezulu lokufeza izinhloso zokuklanywa kabusha kwemingcele. 

Kwejwayelekile ukuba iqembu elibusayo lihlele labo elihlose ukwedlulisela umyalezo walo kubo ngendlela ekhethekile. Isibonelo salokhu yileso sokuthuthwa kwabaselekeli be- ANC bezogcwaliswa ezindaweni ezizinkundla ze-IFP. Lokho kwenziwa ngaphansi kohlelo lokusa iphalamende kubantu. 

Kwenziwe khona lokho eMatatiele lapho bekuhlelwe ukuzokuzwa uvo lwabantu. Baningi ofakazi abazibonele izihlwele zithuthwa ngamabhasi ziphuma esifundazweni saseKoloni eseMpumalanga. Inhloso yokwenza njalo bekungukwenza isiqinisekiso sokuthi kwakhiwe isithombe esifakazela isibalo esikhulu sabantu abafisa ukuba yingxenye yesifundazwe saseKoloni eseMpumalanga. 

Siyakuqaphela ukuthi uhulumeni kakhongolose usina azibethele ehlaba uhulumeni wobandlululo owaphoqelela imithetho nemigomo eyayiphambene nezifiso zabantu. Nakho sekuphinde umansumpa. Nanko phela uhulumeni wentando yeningi oholwa yi-ANC efudula abaseMatatiele eyobatshinga eKoloni eseMpumalanga. Ngithi iqembu likakhongolose seliphenduke abacindezeli ezweni lentando yeningi.       

nguDokotela Lionel Mtshali
UMholi weQembu Eliphikisayo



Contact: Dr Lionel Mtshali, 083 256 4902