AMAZWI ENDUDUZO ETHULWE ENKONZWENI YESIKHUMBUZO SAMAKHANSELA ENKATHA OMKHANDLU WASEMTSHEZI:
DOLLY DLADLA NO MNUMZANE MUSIC MCHUNU EYETHULWE NGU DR LPHM MTSHALI
 

Mqondisi wohlelo, baba Mfundisi osivulele lomsebenzi ngomthandazo nozakwenu abaholi bezenkolo, imindeni emibili esizoyiduduza namhlanje: umndeni wakwaDladla nomndeni wakwaMchunu, izihlobo zonke zalemindeni esibekelwe ifu elimnyama, izimeya zethu namakhansela ethu, bonke abaholi, umndeni wonke weqembu leNkatha, bafowethu nodadewethu.

Ngilapha namhlanje ngokuthunywa nguMhlonishwa uMengameli weqembu leNkatha, uMntwana waKwaPhindangene. Ngizwakalisa ukulila komholi wethu ngesehlo esibuhlungu esinehlele kumasipala waseMtshezi. Sekuthanda ukuba kube nokhondolo lokubulawa kwamakhansela ethu ngesihluku sokudutshulwa. Kwenzeka kwaze kwaphindelela kumasipala wethu waseMbabazane. Siyakuqaphela futhi ukuthi imeya yethu uShelembe yasinda ngokulambisa ihlaselwa ngezibhamu.

Ngibonga kakhulu iqhaza elibanjwe ngumholi wethu oqotho futhi ozinikele enkonzweni yeqembu uMnumzane Stanley Dladla. Siyabonga kakhulu Mgabadeli ngokusukumela phezulu kwakho uxhumanisa ozakwenu nemindeni yamakhansela ethu ehlezi emanzini. Sibonga bonke abaholi boMbutho weNkatha esifundeni soThukela.
Sibonga ukusabela kwenu lapho sekonakele. Sibonga ukunikela kwenu ngesikhathi, izimoto zenu nokunye okuningi nilungisela ukuba amakhansela ethu abekwe ngenkulu inhlonipho endaweni yawo yokuphumula. Sibonga kakhulu kuwe Mnumzane Shelembe ngoholo olunikezile kozakwenu emkhandliwni njenge Meya KaMasipala waseMtshezi. Sithi uNkulunkulu anisekele ekuthwalisaneni imisebenzi egwenya ngabanye.

Sibabaza ulaka nokuphelelwa ngunembeza kwalabo abazinikele emsebenzini ongcolile wokuphuca abanye imiphefumulo ngezizathu ezingaziwa. Siyakhathazeka kakhulu ngesenzo sokulalelwa unyendle nokubulawa kwamakhansela eqembu leNkatha. Ziyohlala njalo zikhona izinsolo zokuthi kungenzeka kube nendlela ehleliwe yokubulawa kwamakhansela ethu. Sengathi abaphenyimacala egazi bangalekelela ekuphenyeni kwabo ukuze kuphele ukusolana nokudlinzelana.

Izenzo ezifana nalesi esehlele amakhansela ethu zenza umphakathi ungakhululeki futhi uhlale ngokwesaba. Kulukhuni ukwemukela ukuthi ukuthula nokubuyisana kuyogxila ezindaweni ezifana nalapha eMtshezi. Nginxusa wonke umphakathi ukuba ubambe iqhaza ekuthungathweni komkhondo walezizinswelaboya ezibulale isekela lemeya yethu kanye nekhansela ebelingusihlalo wekhokhasi. Sonke sididekile sifuna ukwazi ukuthi ngobani laba abalimaza ikhansela lethu uLungile Mhlongo.

Sibonga uNkulunkulu ngokusihlengela impilo kaNkosazana Lungile Mhlongo.
Sikhathazeke kakhulu ngomfanekiso obuhlungu wokubulawa kozakwabo phambi kwakhe kungekho lutho ayengalwenza esimeni sempi yamagwala yokuntshontshana isinyelela. Simfisela ukululama ukuze abenomnikelo njengekhansela leNkatha.

Nginiqinisa idolo bazalwane esimeni esibuhlungu kangaka. Ngithi qinani okholweni nokuthemba uSomandla. Nguye yedwa ophayo. Ngokunjalo uyasephuca labo abathandekayo kithi.Ngizwelana nemindeni eshiywe zithandwa zayo. Lamaqhawe ephucwe injabulo yokubalwa nalabo abenze omkhulu umnikelo eqenjini. Ngithi umfowethu nodadewethu kabafelanga ize. Ungalahli ithemba meya yethu Shelembe.
Ophezu konke uyokunxephezela ngabanye ozakwenu.

Ngiphetha ngalamazwi enduduzo acashunwe encwadini yesibili kaPaula eyilobele abaseKhorinte isahluko 5 v.1. Impilo yethu silapha emhlabeni ingeyesikhashana.
Kasehlukene nalabo abagobe amadlangala. Sinesiqiniseko sokuthi ukuphila okuphakade siyokufumana kwelizayo. Ngakhoke asifane nenceku ethembekile akhuluma ngayo uLuka ongcwele isahluko 12v35-39. izinkalo zenu mazibe ziboshwe nezibani zenu zivutha. Masifane nezinceku ezethembekile ezilinde umyeni oyofika engalindelwe. Sininika ithemba ngeculo 370 emaculweni aseSheshi.

Sivalelisa ngalamazwi kozakwethu asebesishiyile. Sithi hambani kahle zinceku ezethembekile. Nilwile ukulwa okuhle. Niligijimile ibanga ebenilibekelwe.
Nifanele ukuzuza umqhele. Hambani kahle maqhawe eNkatha. Silisho ligcwale ukuthi "Amandla Awethu" "Sonqoba Simunye"

Ngiyabonga.