NgoLwesibili: 09 Mashi 2010

I-IFP ithi kuyadabukisa ukuthi umsebenzi omuhle woMphrofethi Isaya Shembe wokusungula kanzima iBandla lamaNazaretha sewacekelwa phansi yimibango yobuholi ngaphakathi kuleliBandla. I-IFP isho lokhu namuhla ePhalamende lesiFundazwe elihleli ezinkundleni zemidlalo eSabuyaze KwaMaphumulo ngenkathi lihalalisela leliBandla ngokuqeda iminyaka eyikhulu lasungulwa. Leliqembu liqhubeke lathi iBandla lamaNazaretha labanomnikelo emzabalazweni wokukhulula abomdabu kulelizwe, ngokuvuselela ukuziqhenya ngobu-Afrika. Ethula isiphakamiso sokuhalalisela leliBandla, uMnuz. Blessed Gwala oyiLungu lePhalamende elimele i-IFP uthe:

"ISIPHAKAMISO

Ngokuhlala kwaLeNdlu okulandelayo ngiyophakamisa kanje:

"

1.    Sifisa ukuhalalisela iBandla lamaNazaretha njengoba liqeda

iminyaka eyikhulu lasungulwa nguMphrofethi Isaya Shembe

2.    LeliBandla lingelinye lalawo ayeyimpendulo yama-Afrika

ekucwasweni kwawo ngokwebala ngamaBandla ayezalwe e-Yurophu; futhi mkhulu umsebenzi elawenzayo ukuvuselela ukuzethemba kuma-Afrika nokuziqhenya ngempilo yomdabu.

3.    Nokho kuyasidabukisa ukuthi umsebenzi omuhle woMphrofethi

uShembe sewacekelwa phansi yimibango yangaphakathi eseyaholela ekuhlakazekeni kwaleliBandla.

"LeNdlu inquma:

1.    Ukwethulela isigqoko ngenhlonipho uMqali weNdlela nalabo baHoli

abaliphatha ngobunono leliBandla

2.    Ukukuqopha phansi iminikelo yaleliBandla yokuvuselela isithunzi

sobu-Afrika eyaba nomthelela onqala emzabalazweni wokukhulula abomdabu

3.    Ukunxusa zonke izinhla zaleliBandla ukuba zakhohlwe

ngukuzicabangela zona kepha zisebenzele ubunye beBandla njengesipho esimqoka sokuhlonipha leliqhawe le-Afrika elingumsunguli walo

kuleminyaka eyikhulu"   

Ngeminye imininingwane thinta:

UMnuz. Blessed Gwala

Ilungu LePhalamende                             078 690 5777