21 Julayi 2010

UPhiko lweNtsha ye-IFP luthi luyakunaka ukuphawula koPhiko lweNtsha ye-ANC KwaZulu-Natali, ebeka uMholi we-IFP njengondlovukayiphendulwa. 

NgokweNtsha ye-IFP, lokhu kakukhombi nje kuphela ukungephusi, ukubamiqondo-mifishane, nokuntululwazi kweNtsha ye-ANC ngokombusazwe; kepha futhi kukhomba nokungaziqondi izinto eziyizisekelo kwezombusazwe. 

"Undlovukayiphendulwa ngokwemvelo yakhe ngumuntu ongafuni ukudedela amandla, lokho okungenjalo ngoMntwana wakwaPhindangene. 

Kungubuphukuphuku ukuthi uMntwana uyihlehlisa ngabomu iNgqungquthela ngoba esaba ukuthi uzodliwa yivoti; ekubeni engakasho ukuthi uzophinda yini alumele ukhetho lwesikhundla sikaMengameli. Ngaphezu kwalokho, sekuneziqubu ezimbili uMengameli we-IFP ezwakalisa inhloso yakhe yokushenxa Eesikhundleni kepha wanxenxwa ngamalungu eqembu. Usebenza kulesikhundla ngokucelwa yi-IFP futhi usebenzela ukusikalala kwayo; hhayi ngoba engazimisele ukudedela amandla," kusho uPat Lebenya-Ntanzi iLungu lePhalamende nonguSihlalo kaZwelonke weNtsha ye-IFP. 

Wenezele ngokuthi "isinqumo sokuhlehlisa iNgqungquthela ye-IFP kwaba ngesathathwa nguMhlahlandlela we-IFP ngo-elethu; kakubanga nje yisinqumo soMntwana njengoba  iNtsha ye-ANC ibika." 

UNkk Lebenya-Ntanzi uthe i-ANCYL iyaziwa ngokuhlasela kwayo uMntwana, lokho okuvusa imibuzo enzulu ngokuthi bayinhlangano yezombusazwe ephusileyo yini noma bayiqoqo lemigulukudu, okuthi esikhundleni sokuba ixoxe izindaba zombusazwe eziqondene nesimo bona beneliswe nje yikuhlasela abantu abamqoka. 

"UPhiko lweNtsha ye-IFP lalungawujoyina umshungu wokuhlekisa ngoMengameli we-ANC ngenkathi abezindaba bememza inhlekisa ngezindaba zakhe zothando olungaphandle komshado kanye neningi lamanye amaphutha akhe ezombusazwe; kepha sazithiba ekwenzeni lokho ngoba sasikhanyelwa yikuthi kwakungeke kubenamnikelo ezindabeni zombusazwe zansuku-zonke. 

Kuze kube manje futhi kasikaze siphawule ngoqhekeko olodla-lubi kulo uPhiko lweNtsha ye-ANC oseluholele ekuxoshweni kukaMnuz. Masoga; ngoba njengeqembu kasithokoziswa yikugiya ngezinkinga ezisuke zibhekene namanye amaqembu ombusazwe. Siyazi ukuthi amaqembu ombusazwe azinzileyo ayadingeka ukuze kubenentando yabantu ezinzileyo," kusho uLebenya-Ntanzi. 

Wenezele ngokuthi, "ukuxosha umholi wentsha ngoba nje engachemanga noMengameli we-ANCYL, uMnuz. Julius Malema kuyisibonelo esiqandikhanda sokuthi iNtsha ye-ANC isebenza ngemigomo yobundlovukayiphikiswa. 

Mhlawumbe kuyoba ngubuhlakani ukuba i-ANCYL ishanele indlu yayo kuqala ngaphambi kokushumayeza i-IFP." 

UNkk Lebenya-Ntanzi uthe izinsolo zokuthi i-IFP "kayisiyo inhlangano ebusa ngokwentando yabantu kepha ingumbutho womdabu wamasiko "  kazisilo neze iqiniso. 

"Selokhu kwathi nhlo i-IFP ilawulwa yimigomo yentando yabantu futhi simi kasizamazami ekuzinikeleni kulemigomo. Kube yingenxa yakho kanye lokho kuzinikela entandweni yabantu ukuba i-IFP inqume ukuyihlehlisa iNgqungquthela kuze kube yilesosikhathi lapho isimo sesilungile, ukuze intando yempela yabantu izwakaliswe ngokhetho lwentando yabantu. 

"Ngaphezu kwalokho, ukukhuluma okuthi siyinhlangano yamasiko kuyikukhulumsa okusangeneyo: Nxa nje uthi nhla kulabo abasimele kuhulumeni uzobona ukuthi singukuphela kweqembu lapho izinhlanga zalelizwe zimeleleke kahle ngaphezu kwawowonke amanye," kusho uNkk Lebenya-Ntanzi. 

Okokugcina uSihlalo we-IFPYB uthe liyihlaya ikhwelo lokuba i-IFP ijoyine i-ANC. 

"Ngenkathi i-ANCYL isola ngokungeyikho i-IFP ngokuba yinhalngano engabusi ngokwentando yabantu, lona kanye lelikhwelo le-ANCYL lokuba i-IFP ijoyine i-ANC lingubufakazi bokuthi kabazinikele ekubuseni ngentando yabantu lapha eNingizimu Afrika. Ekuphokopheleni kwabo ekwenzeni iNingizimu Afrika ibeqembu-linye, bafuna ukubona wonke amaqembu aphikisayo ehluleka. Kungumthwalo wabaholi abasha be-IFP ukuqinisekisa ukuthi i-IFP kayiphephi nje kuphela kepha futhi iyakhula; lokho bekwenzela abantu abantu baseNingizimu Afrika kanye nombuso wakithi wokubusa ngamaqembu amaningi,"  kuphetha uNkk Lebenya-Ntanzi. 

Siyaphela
Ngeminye Imininingwane thinta:
UNkk Pat Lebenya Ntanzi MP; 078 186 3619 

Noma uNksz. Liezl van der Merwe
IsiKhulu se-IFP SokuXhumana NabeziNdaba; 082 729 2510